Alessandro Procacci

Sa Alessandro Procacci a i ho incmincèd a recitè e lo l'è stèd el prém a fèm amè el Teatre. A i avéva solamènt 18 ann quand a sò gid timidamènt a chèsa sua par dmandèj un lavor da pudé rapresentè sala Compagnia ch'a i avémmi méss sò al Teatre "Manzoni" d'i Capucén; da chel giorne... pasè le ora t'la saletta a sentì le su' comèdi, insièm sa Marco Andreani, la i era dventèda na gran bèla abitudin. Sa la su' riservatezza el ce proponeva un tèst e el ce dciva: "Quest avrìa da gì bèn…" e nojatre a i armanémmi a "véda" le su' "comediòl", cum i le chiamèva lo, létt sa na voc' ch'la rispechièva tutta l'arguzia e la genuinità de cle stòri.
Era evidènt la gioia ch'l'aveva t'el presentèc' i su' lavor e t'el racuntèc' le su' esperienz teatrèl, j ator ch'l'aveva cnosciud, l'ideazion e l'organizazion del prém G.A.D., la su' pasion par la Lirica, i personagg' d'una vèchia Pèsre che nojatre an cnoscémmi e dòp… i su' ricòrd de diretor d'l' Osservatorio Valerio e me, ragazén, a stèva a sentì i su' arcont cum se sta a sentì ma un nonn, un nonn ch'el m'ha aiutèd a scuprì la belissima pasion par el Teatre. Le su' comèdi indò a i ho recitèd le i è: “Un ucc’lacc ch’el s’chièma cicogna” – “El ded s’la front” – “Co’ la fa la sora Rosa” – “Basta spegna in temp la luc’” – “S’mòv qualcò sotta el mela” – “Cum se pianta le carotol”.
T'el 2006 è stèd pubblichèda na racòlta d'i su' sonétt e storièll in bsarés intitolèda “La Casa del Poeta” a cura de Ida Baci Consani, sa na belissima introduzion de Ivana Baldassarri.