Sól un giógh ch'en vò dì gnènt,
scritt par pur divertimènt,
par duprè paròl pur sia
méssle acsé, sol par ligrìa.
Un curdlén mòss dal garbén,
un fiulén sa'l su' zulén
che, purtén, fa el bregnulén.
Un c'marèll, un calcinèll,
dó grancèll e dó trufèll.
Un gunfión sa'l bulirón
e sa un sción a spindulón.
Un cupén, un gruvatén,
un mursicch, un birificch,
un bamblón e un papulón
ch'i mastriccia 'na costiccia.
Una bréga, una bulzéga,
un zaclón, un bucalón
ch'l'è tachèd ma'l su bución.
I bòciol, le còciol,
i bìgol, le bócol,
i cìgol, i rùgol.
Una mucchia d'zagubén,
un struzén e un furnarén,
le bricòcol, le brignòcol,
tant zavàj e batanaj.
Impipìd e imbarbugìd,
invurnìd e incudighìd,
incrichèd e infraidèd,
sbuganèd e ingavinèd.
Chi a cuvión, chi a spargujón,
un sfrumblón a bigantón,
'na grancèla in ciampanèla,
un stragén de ciacagnén.
Sól un giógh ch'en vò dì gnènt:
parol scritt… par ténle a mènt!
Paolo Cappelloni
